دو ٹیسٹ میچوں کی سیریز کے پہلے ٹیسٹ کے پہلے دن کا کھیل ختم ہونے تک پاکستان نے جنوبی افریقا کے خلاف اپنی پہلی اننگز میں 5 وکٹوں کے نقصان پر 313 رنز بنا لیے۔
قذافی اسٹیڈیم لاہور میں کھیلے جا رہے میچ میں پاکستان کے کپتان شان مسعود نے ٹاس جیت کر پہلے بیٹنگ کا فیصلہ کیا۔
پاکستان کی اننگز کا آغاز عبداللہ شفیق اور امام الحق نے کیا، تاہم اوپننگ شراکت زیادہ دیر قائم نہ رہ سکی۔ عبداللہ شفیق صرف 2 رنز بنا کر جلد ہی پویلین لوٹ گئے۔
اس کے بعد شان مسعود اور امام الحق کے درمیان شاندار 161 رنز کی شراکت قائم ہوئی۔ کپتان شان مسعود 76 رنز کی عمدہ اننگز کھیل کر آؤٹ ہوئے۔
پاکستان کا اسکور 199 تک پہنچا تو امام الحق 93 رنز پر اپنی وکٹ گنوا بیٹھے۔ اگلی ہی گیند پر سعود شکیل بغیر کوئی رن بنائے آؤٹ ہو گئے۔
اسی اسکور پر بابر اعظم بھی 23 رنز بنا کر پویلین لوٹ گئے، یوں پاکستان کو محض چند گیندوں میں تین بڑے نقصانات برداشت کرنے پڑے۔
مشکل وقت میں محمد رضوان اور سلمان علی آغا نے ذمہ داری کا مظاہرہ کرتے ہوئے اننگز کو سنبھالا اور چھٹی وکٹ کے لیے 114 رنز کی شراکت قائم کی۔
پہلے دن کا کھیل ختم ہونے تک محمد رضوان 62 اور سلمان علی آغا 52 رنز کے ساتھ کریز پر موجود ہیں۔
میچ سے قبل ٹاس جیتنے کے بعد شان مسعود کا کہنا تھا کہ ہوم کنڈیشنز سے فائدہ اٹھانے کی بھرپور کوشش کریں گے، جبکہ جنوبی افریقا کے کپتان ایڈن مارکرم نے کہا کہ وہ پاکستان کو جلد آؤٹ کرنے کی حکمت عملی کے تحت میدان میں اترے ہیں۔
پاکستان کی پلیئنگ الیون:
شان مسعود (کپتان)، امام الحق، عبداللہ شفیق، بابر اعظم، محمد رضوان (وکٹ کیپر)، سعود شکیل، سلمان علی آغا، حسن علی، شاہین آفریدی، ساجد خان، نعمان علی۔