قومی کرکٹ ٹیم کے سابق کپتان بابر اعظم نے پی سی بی اسکلز کیمپ میں جارح مزاج اوپنر فخر زمان کو بیٹ موومنٹ اسپیڈ اور پاور فیکٹر ہٹنگ کے مقابلے میں شکست دے دی۔
پاکستان کرکٹ بورڈ (پی سی بی) کی جانب سے جاری کردہ ویڈیو کے مطابق نیشنل کرکٹ اکیڈمی لاہور میں جاری اسکلز کیمپ کے دوران ایک انوکھا ہٹنگ مقابلہ کرایا گیا، جس میں بابر اعظم اور فخر زمان آمنے سامنے آئے۔
بیٹنگ کوچ حنیف ملک کی زیر نگرانی ہونے والے اس ایک اوور پر مشتمل مقابلے میں دونوں کھلاڑیوں کی بیٹ سوئنگ اسپیڈ اور پاور موومنٹ کو ماپا گیا۔ فخر زمان کی زیادہ سے زیادہ بیٹ سوئنگ اسپیڈ 74 کلومیٹر فی گھنٹہ اور پاور موومنٹ 761 ریکارڈ ہوئی۔
دوسری جانب بابر اعظم نے اپنی پہلی گیند پر ہی 89 کلومیٹر فی گھنٹہ کی بیٹ موومنٹ اسپیڈ دکھائی، جبکہ ان کا پاور فیکٹر 1027 رہا۔ آخری گیند پر بابر اعظم کی اسپیڈ بدستور 89 کلومیٹر رہی تاہم ان کی پاور 10137 تک پہنچ گئی۔
یہ ہٹنگ اسپیڈ چیلنج شائقین کرکٹ کی دلچسپی کا مرکز بن گیا ہے، جہاں بابر اعظم کی فارم اور مہارت کو ایک بار پھر سراہا جا رہا ہے۔
