عیدالاضحیٰ پر ریلیز ہونے والی رومانوی کامیڈی فلم "لو گرو" نے ریلیز کے چند دنوں میں ہی شائقین کے دل جیت لیے اور باکس آفس پر نیا ریکارڈ قائم کر دیا ہے۔ فلم نے پاکستان بھر سے 12 کروڑ روپے اور دنیا بھر سے مجموعی طور پر 28 کروڑ روپے کا بزنس کر کے مقبول ترین فلموں کی فہرست میں جگہ بنا لی ہے۔
ماہرہ خان اور ہمایوں سعید کی مرکزی اداکاری والی اس فلم نے 11 کروڑ روپے کمانے والی "دی لیجنڈ آف مولا جٹ" کو بھی پیچھے چھوڑ دیا ہے۔
فلم کی کہانی ایک خود ساختہ "لو گرو" کے گرد گھومتی ہے جو لندن میں مقیم ایک آرکیٹیکٹ لڑکی صوفیہ سے غیر متوقع طور پر جُڑ جاتا ہے۔ اس دل چسپ اور مزاح سے بھرپور رومانوی داستان کو شائقین کی جانب سے بھرپور سراہا جا رہا ہے۔
فلم کے ہدایت کار ندیم بیگ ہیں، کہانی وصی چوہدری نے لکھی ہے جبکہ فلم کو ہمایوں سعید نے پروڈیوس کیا ہے۔ فلم کی شوٹنگ لندن اور پاکستان کے مختلف مقامات پر کی گئی، اور اس پر 28 کروڑ روپے لاگت آئی۔