انوشکا شرما اور ویرات کوہلی نے بالآخر وہ فیصلہ کر لیا جس کا خواب شاید ہر مشہور شخصیت دیکھتی ہے — ’’عام زندگی‘‘ جینے کا۔ انوشکا اور ویرات نے لندن کو اپنا نیا گھر بنایا ہے تاکہ وہ شہرت کی چکاچوند سے دور اپنے بچوں کو ایک نارمل ماحول فراہم کر سکیں۔
اداکارہ مادھوری ڈکشٹ کے شوہر ڈاکٹر سری رام نینے نے اپنے پوڈکاسٹ میں انکشاف کیا کہ بھارت میں مسلسل عوامی توجہ اور میڈیا کے تعاقب نے اس جوڑے کی نجی زندگی کو متاثر کیا تھا۔ چاہے کسی پارک میں سیر ہو یا ریسٹورنٹ میں کھانا، ہر لمحہ مداحوں اور کیمروں کے نرغے میں گزر رہا تھا۔
انوشکا اور ویرات چاہتے تھے کہ ان کے بچے وامیکا اور اکائے ایک ایسی زندگی جی سکیں جس میں سکون، آزادی اور خوشی ہو۔ اسی لیے لندن کو چنا گیا — ایک ایسا شہر جہاں وہ اپنی زندگی کے خوبصورت لمحات بے فکری سے جی سکیں۔
پیشہ ورانہ طور پر، ویرات اب بھی کرکٹ میں متحرک ہیں اور آئی پی ایل 2024 میں شان دار کارکردگی دکھا رہے ہیں، لیکن میدان سے باہر اب ان کی ترجیح ایک پُرسکون اور خوشحال خاندانی زندگی ہے۔